སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

ཞལ་དཀར་གྱིས་ཧོར་གྱི་བླ་ལྕགས་གཏོར་བའི་རྣམ་པ།

ཞལ་དཀར་གྱིས་ཕྱག་མདའ་འཕངས་པ།

དེ་ཡང་གླིང་རྗེ་གེ་སར་སྐྱེས་བུ་ནག་པོ་བདུད་འདུལ་ལ་ཕེབས་པའི་སྐབས།ཕྱག་མདའ་ཐོག་རྒོད་འཕུར་ཤེས་འདི་དང་། དགྲ་བླའི་ཚེ་གོས་སྨུག་པོ་རྨ་བྱ་མཇིང་བསྣོལ།ཚེ་མདུད་རྡོ་རྗེའི་གོ་ཁྲབ་རྣམས་ལྡོང་འབུམ་པའི་ཞལ་དཀར་རྒྱལ་པོར་གནང་སྟེ། རྡོ་རྗེའི་ཚིག་གི་ལུང་བསྟན་ལ།མི་སྲིད་སྲིད་པའི་དུས་ཚོད་ལ།། ཧོར་གད་པ་སྐྱ་རིང་གཡས་ཟུར་ནས།།མི་དམར་ནག་ཁྲག་གི་མིག་རྩ་ཅན།།རྟ་རག་ནག་རླུང་གི་གཤོག་པ་ཅན།།རྒྱ་ཚའི་གདོང་ལ་བྱུང་བའི་དུས།།མདའ་འཕུར་ཤེས་ཐོག་ལྕེ་འདི་འཕོངས་ཤིག །དཔེ་ཆུ་སྲིན་དུང་གིས་ཕུག་པ་འདྲ།།ཞལ་དཀར་ནོར་བུ་འགྱུར་བ་མེད། །གླིང་ལྷ་སྡེ་རྒྱ་མཚོའི་གཏིང་ན་རྒྱལ།།དེ་མིན་མདའ་དེ་མ་སྒུལ་ཨང་། །ཞེས་གསུངས་ནས་གནང་བ་དགོས་ངེས་ཤན་པ་རྨེ་རུ་ལ་འཕེན་དགོས་པ་ཡིན་མོད།གཅིག་འབུམ་པའི་ཞལ་དཀར་དགྲ་འདུལ་རྒྱལ་པོ་མཆོག་སྐུ་ཚེ་མི་འགྱུར་ཡུན་རིང་བཞུགས་རྒྱུར་གླིང་དཀར་པོའི་བསོད་ནམས་གྱིས་མ་འདང་བ་དང་།གཉིས་ཧོར་གྱི་བླ་ལྕགས་ཁམས་གསུམ་གྲོང་འཇོམས་ནག་པོ་ཞེས་དངོས་མེད་ཀྱི་དགྲ་བོ་འཇིག་རྟེན་ཁམས་ལ་གནས་མི་རུང་བ་དེ་མྱུར་དུ་འདུལ་དགོས་ན།རྒྱལ་པོ་གེ་སར་གྱི་ཕྱག་མདའ་འདི་མིན་མཚོན་གཞན་གྱིས་མི་ཐུལ་བ་སོགས་རྒྱུ་རྐྱེན་དུ་མས་བསྐུལ།ཧོར་གླིང་གཉིས་གཡུལ་འཁྲུག་དྲག་པོའི་དུས་ཤིག་ན།གོང་སྨན་རྒྱལ་མོའི་ལུང་དོན་ལྟར་འབྲུག་མོས་ཧོར་གྱི་བླ་གནས་གླིང་གི་མདའ་འབེན་ལ་བཞག་་ཐབས་མཛད་ཉིན།ཁྲི་དཔོན་ཞལ་དཀར་དང་།བློན་ཆེན་འདན་མ་གཉིས་ཀྱིས་ཕྱག་མདའ་མཉམ་འདོན་སྐབས།ཞལ་དཀར་གྱི་དོང་བ་ནས་ཕྱག་མདའ་ཐོག་རྒོད་འཕུར་འདོད་ཀྱི་མངོན་རྟགས་བྱུང་བ་ལྟར་གདོང་འབུམ་པའི་ཞལ་དཀར་རྒྱལ་པོས་ལྷ་འབོད་བཅས་འཕངས་ཏེ།ཐོག་འབྲུག་གློག་གསུམ་གྱི་སྒྲ་འོད་དང་འགྲོགས་པའི་མདའ་རྒོད་དེ་གནམ་ལྕགས་ཀྱི་ཐོག་ལྟར་ཧོར་གྱི་བླ་གནས་འཇིག་རྟེན་གྱི་དགྲ་བོ་དེ་ལ་ཕོག་ནས་ཐལ་བར་བརླགས་པའི་རྣམ་པ་ཡིན།

འདྲ་པར་འདི་༡༩༦༢ལོར་མཚོ་སྔོན་མི་རིགས་དཔེ་སྐྲུན་ཁང་ནས་བསྐྲུན་པའི་ཧོར་གླིང་གཡུལ་འགྱེད་སྟོད་ཆའི་བར་བཅུག་རི་མོ།བོད་ཀྱི་གླིང་སྒྲུང་ཁྲོད་ཀྱི་བར་བཅུག་རི་མོ་རྙིང་ཤོས་གྲས་རིན་ཐང་ཅན་ཡིན།རི་མོ་འདི་མགོ་ལོག་སྨིན་ཐང་གི་སྒྲུང་མཁས་རྒན་པོ་རྩེ་བ་ཐུབ་འཇིགས་ཟེར་བས་རིག་གསར་མེ་ཀློང་དུ་མ་བཏང་བར་ཉར་ཚགས་བྱས་ནས་ལྷག་པ་ཡིན་པས།ཕྲན་གྱིས་འདི་ནས་ཆེད་དུ་སྒྲུང་དགའ་འདས་པོ་ཁོང་ལ་བཀའ་དྲིན་ཞུ་བ་ཡིན

 

 

ཀློག་གྲངས།:[5124]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com