སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི།བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་།དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར།དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས།བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་།དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ།ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ།གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད།འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས།གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་།གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ།གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ།མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་།ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན།དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ།།ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་ སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

རི་བ་བག་ཡོད་པའི་གསུང་བྱིན་ལྡན།

༈ རིག་འཛིན་འཛམ་གླིང་བརྒྱན་མཆོག་གི་འཁྲུངས་རབ་གསོལ་འདེབས་པདྨ་དཀར་པོའི་ཕྲེང་བ་

ཞེས་བྱ་བ་བཞུགས་སོ། །

ན་མོ་གུ་རུ་མཉྫུ་ཤྲཱི་ཡེ།ཆོས་དབྱིངས་ཁྱབ་བརྡལ་འོད་གསལ་མཁའ་དབྱིངས་ལས། །མ་བཅོས་ལྷུན་གྲུབ་བདེ་ཆེན་སྙིང་རྗེ་ཡི།།སྤྲོས་བྲལ་རིག་པའི་རང་གསལ་མ་འགགས་པ། །ཀུན་བཟང་རྡོར་འཆང་སྤྱན་གཟིགས་འཇམ་དཔལ་དབྱངས།གསོལ་བ་འདེབས་སོ་མཆོག་ཐུན་བྱིན་རླབས་སྩོལ། །སྔོན་ཚེ་མར་མེ་མཛད་ཀྱི་བསྟན་པ་ལ།།བྱང་ཆུབ་སེམས་དཔའ་བློ་གྲོས་རིན་ཆེན་དཔལ། །བསྐལ་པ་བཟང་པོ་འདི་ལ་ཐུགས་བསྐྱེད་པ།།འཁོར་བ་འཇིགས་དང་གསེར་ཐུབ་འོད་སྲུང་ཅན། །ཚངས་བྱིན་འཁོར་ལོའི་དཔའ་བོ་སེང་གེ་ཟེར། །དེད་དཔོན་དཔལ་གྱི་དབང་ཕྱུག་མི་ཞུམ་སྡེ།།བྲམ་ཟེ་ཆེན་པོ་ཀུ་ན་དྲིག་ཆེན་པོ། །ཐུབ་ཆེན་དོན་ཀུན་གྲུབ་པའི་ཉན་ཐོས་ཆེ།།ཉེ་བར་འཁོར་ཞེས་བཀའ་ཡི་བསྡུ་བ་པོ། །གངས་ཅན་བོད་ཀྱི་ཆོས་རྒྱལ་ཁྲི་སྲོང་བཙན།།གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །སྨོན་ལམ་ལས་སད་ཚངས་པ་ཆེན་པོའི་སྲས།།དྲི་མེད་མདངས་ལྡན་པདྨའི་ཞལ་རས་ཅན། །མཐོ་ན་དཔལ་གྱི་འབྱུང་གནས་ཐོས་པ་དགའ། །སྔོན་གྱི་ཐུགས་བསྐྱེད་སྨོན་ལམ་སྟོབས་ཆེན་པོ།།ལྷ་དབང་བརྒྱ་བྱིན་པདྨའི་ཚལ་ཆེན་ལས། །འདབ་སྟོང་རྒྱས་པའི་དབུས་སུ་པདྨ་འབྱུང༌།།བདེ་བར་གཤེགས་པ་སྐར་ཚོགས་གྲངས་མང་བ། །ཀུན་ཀྱིས་བཀའ་གྲོས་བདུད་འདུལ་དཔའ་བོ་ཆེ།།ཚངས་སྲས་ལྷ་བུ་ཐོས་དགའ་ཕོ་ཉར་བཏགས༔ གསོལ་བ་འདེབས་སོ་སྨོན་ལམ་མཐར་ཕྱིན་ཤོག།སྨོན་སྐྱིད་རྨ་ཡུལ་ས་ཡི་ཐིག་ལེ་རུ། །མཐོང་བ་ཀུན་སྨོན་ཞེས་སུ་སྐུ་བལྟམས་པ། །སྐུ་རྗེ་གེ་སར་དགྲ་བླའི་སྐྱེས་བུར་གྲགས།།ས་ཆེན་གཡོ་བའི་སྟོབས་ཀྱིས་གར་དགུའི་རོལ། །འབར་བའི་ཁྲོ་རྒྱལ་རྡོ་རྗེ་མེ་རི་ཡིས།།ལྷ་མིན་འཕུར་བའི་བྱ་སྒྲོ་མེར་བསྲེགས་བཞིན།།རིག་འཛིན་ལྷ་དམག་རྒྱ་མཚོ་དབྱིངས་ནས་བསྐུལ།།ཉོན་མོངས་རྒྱལ་ཁབ་བཅོ་བརྒྱད་ཐལ་བར་བརླག །རྒྱལ་བསྟན་རིན་ཆེན་གདུགས་དཀར་སྲིད་རྩེར་བསྒྲེངས།།དཀོན་མཆོག་དབུ་འཕང་མཐོ་བའི་དབྱར་རྔ་བསྒྲགས།།གསོལ་བ་འདེབས་སོ་བདུད་བཞིའི་བར་ཆད་སོལ། །ལྔ་བདོའི་མར་ཤམ་དུ་རུའི་མཇུག་ལྡང་ཚེ།།རིགས་ལྡན་དྲག་པོ་ལྕགས་ཀྱི་འཁོར་ལོ་ཅན། །གྱུར་ནས་ཡིད་སྲུབ་དཔུང་བཅས་བརླག་པར་མཛད།།མ་འོངས་བསྐལ་པ་འདི་རུ་མངོན་སངས་རྒྱས། །དེ་བཞིན་གཤེགས་པ་སྒྲོན་མ་སྣང་ཆེན་པོར།།མངོན་པར་གྱུར་ཚེ་སྐྱེས་བུ་ཆེན་པོ་ལ། །གུས་ཤིང་མོས་པས་སྐྱབས་སུ་གྱུར་པ་ཀུན།།འདུས་པ་དང་པོར་དགྲ་བཅོམ་འབྲས་བུར་འཐོབ། །གཟུགས་ཅན་གཟུགས་མེད་ཡིད་ཅན་མཐའ་དག་རྣམས། །ཉོན་མོངས་མེད་ཅིང་ཕྱིར་མི་ལྡོག་ཏུ་བཀོད།།མདོར་ན་བདེ་གཤེགས་གཅིག་བསྡུས་པད་འབྱུང་རྗེའི།།རྣམ་རོལ་ཆེན་པོ་འཛམ་གླིང་རྒྱན་མཆོག་ལ། །གསོལ་བཏབ་གསང་བ་གསུམ་དང་དབྱེར་མེད་པ།།ཟབ་རྒྱས་ཆོས་ཀྱིས་འགྲོ་རྣམས་སྨིན་པ་དང༌། །ཐེག་ཆེན་ལམ་ལ་བར་ཆད་མེད་པ་རུ།།སྐྱེ་ནས་སྐྱེ་བར་ཁྱེད་ཀྱི་རྗེས་བཟུང་ཞིང༌། །མགོན་དེའི་གོ་འཕང་མྱུར་དུ་འགྲུབ་གྱུར་ནས།བར་ཆད་ཀུན་ཞི་དོན་གཉིས་ལྷུན་འགྲུབ་ཤོག །རེ་བའི་འབྲས་བུ་མཐའ་དག་འབད་མེད་པར།།རྟག་ཏུ་བཅོལ་བའི་སྐྱེས་མཆོག་དགྲ་བླ་ཆེས། །རྣལ་འབྱོར་བསམ་པ་འགྲུབ་པར་མཛད་དུ་གསོལ།།ཅེས་པ་དགེ་བཅུའི་ཁྲིམས་ཀྱིས་མངའ་འབངས་ཆོས་བཞིན་སྐྱོང་བ་གནམ་སྒར་མི་དབང་གི་ཏརྠའི་བཀའ་ལྡོག་ཏུ་མ་སྤོབས་པས།མདོ་སྔགས་རྒྱུད་ལུང་གང་ལའང་ལྟ་ས་མེད་པ་དེང་སང་སྒྲུང་རྣམས་རྟ་མོག་རོའི་སྤུ་འདྲ་བ་ལྟ་ཞོགརང་ཡང་བློ་གཏད་སོ་མེད་ཀྱང༌།རྫུན་བག་ཙམ་གྱིས་བསྒྲིགས་པ་ཡེ་ཤེས་སྤྱན་ལྡན་རྣམས་ལ་བཤགས་ཤིང་འོན་ཀྱང་སྐྱེས་བུ་ཆེན་པོའི་བྱིན་རླབས་ཅུང་ཙམ་ཐོབ་པ་རེ་སྨོན་བགྱིས་ཏེ་འགྲོ་བ་ཀུན་ལ་དཔལ་འབྱོར་དགེ་ལེགས་བཀྲ་ཤིས་དཔལ་འབར་གྱིས་གནས་གྱུར་ཅིགརབ་རྒྱལ་ཆུ་རྟ་ཟླ་ཚེས་ལ་རི་པ་བག་ཡོད་སྤྲུལ་མིང་པས་བྲིས་བ་དགེ །

 

 

ཀློག་གྲངས།:[3748]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com