སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

པཎ་ཆེན་སྨྲྀ་ཏིའི་འདྲ་སྐུ་ཞིག་མཇལ་སྐབས་ཀྱི་ལབ་གླེང་།

           པཎ་ཆེན་སྨྲྀ་ཏིའི་འདྲ་སྐུ་ཞིག་མཇལ་སྐབས་ཀྱི་ལབ་གླེང་།


རྒྱ་གར་གྱི་པཎ་ཆེན་སྨྲྀ་ཏི་ཛྙ་ན་འམ་དྲན་པ་ཡེ་ཤེས་མཆོག་ནི། གླིང་རྗེ་གེ་སར་སྐྱེས་བུའི་མཛད་རྣམ་དང་འབྲེལ་ཡོད་ཀྱི་དཔྱད་གཞིའི་མི་སྣ་གལ་ཆེན་ཞིག་ཡིན་ལ། པཎ་ཆེན་འདི་བ་སྒ་འཛོམ་ཉག་གི་མཆོད་རྟེན་དཀར་ཆགས་སོགས་ལ་གཞི་བཅོལ་ཏེ་གཞིགས་ན། ཁོང་རྒྱ་གར་ཡུལ་དབུས་ཕྱོགས་ཀྱི་རྒྱལ་པོ་རྩིབས་ཀྱི་མུ་ཁྱུད་ཅེས་པའི་སྲས་སུ་འཁྲུངས་པ་ཡིན་ཚུལ་གསལ་ཙམ་དང་། གཞན་རྒྱ་གར་གྱི་གྲུབ་ཆེན་ནཱ་རོ་བའི་སློབ་མ་དང་། བོད་ཀྱི་བྲོམ་སྟོན་པ་རྒྱལ་བའི་འབྱུང་གནས་སོགས་ཀྱི་བླ་མ་ཡིན་ཚུལ་གྱིས་འཚོ་བཞུགས་ཀྱི་དུས་ཚོད་འཚོལ་པ་དང་། མཐར་དྲན་ཐང་དུ་འདས་ཚུལ་བཤད་རྒྱུ་ཙམ་མ་གཏོགས། འཁྲུངས་འདས་ཀྱི་ལོ་ཁམས་གསལ་བོ་མི་ངེས་ཕྱིར། ད་ཆ་དོན་གཉེར་བ་ཚོའི་དཔྱད་གཞི་གལ་ཆེན་ཞིག་ཏུ་གྱུར་ཡོད་ལ། བཤད་རྒྱུན་ལྟར་ན་པཎ་ཆེན་སྨྲྀ་ཏི་བོད་དུ་ཕེབས་ལམ་ལོ་ཙཱ་བ་འདས་རྐྱེན་གྱིས་གཙང་རྟ་ནག་ཅེས་པའི་ཡུལ་དུ། འབྲོག་ཚང་གཅིག་གི་གཡོག་པོར་བཞུགས་དགོས་ཐུག་ཏེ། ངུ་སྤྲོ་བ་གསུམ་དང་། དགོད་སྤྲོ་བ་གསུམ་སོགས་སྐུ་ཚེགས་འོ་བརྒྱལ་བརྗོད་འདས་མྱངས་པའི་རྣམ་ཐར་བྱུང་བ་དང་། ཉིན་ཞིག་ཁོང་རང་ཉིད་ཀྱི་ཡོན་ཏན་དང་གནས་བབས་ལ་དགོངས་ནས་ཐུགས་སྐྱོ་ལྷང་ལྷང་ངང་། མི་ཁྱིམ་དེའི་སྒོའི་ཡ་ཐེམ་དུ། རི་བོང་འཛིན་པ་རྒྱུ་སྐར་ཕྲེང་བ་ཅན། ། མཚན་མོ་མཁའ་ལ་རྒྱུ་བ་མ་མཐོང་ནས། ། དྭངས་པའི་མཚོ་ནང་འདི་ན་ཟླ་བ་ཞེས། ། གཟུགས་བརྙན་ཟླ་བར་འཛིན་པ་ཤིན་ཏུ་འཁྲུལ། ། ཞེས་པའི་ཚིགས་བཅད་ཕྱག་བྲིས་མཛད་དེ་སྦྱར་ཡོད་པ། ཁོང་སྔོན་རྒྱ་གར་དུ་བཞུགས་དུས་ཀྱི་སློབ་མ་ལོ་ཙཱ་བ་དཔྱལ་བསོད་ནམས་རྒྱལ་མཚན་ཞེས་པས་མཇལ་ཙ་ན། རང་གི་སློབ་དཔོན་གྱི་ཕྱག་བྲིས་ཡིན་པ་ངོ་ཤེས་ཤིང་འདི་སུས་བྲིས་ཞེས་རྩད་བཅད། ཁྱིམ་ཚང་དེའི་མིས་ཡི་གེ་འདི་ངེད་ཚང་གི་ལུག་རྫི་ཐང་རྙེད་ཀྱིས་བྲིས་པ་ཡིན་ཚུལ་བཤད། ལོ་ཙཱ་བས་མི་ཁྱིམ་དེ་ལ་ཁྱེད་ཚང་གི་རྫི་བོ་ཐང་རྙེད་དེ་མི་རང་བཞིན་པ་ཞིག་མིན་ཚུལ་དང་། རང་གི་བླ་མ་ཡིན་ལུགས་གསལ་བཤད་བཅས་མི་ཁྱིམ་དེར་གསེར་སྤྲད་དེ་པཎ་ཆེན་སྨྲྀ་ཏི་སྨན་ལུང་ཞེས་པའི་གནས་སུ་གདན་དྲངས་ནས་ཆོས་དང་མན་ངག་མང་པོ་ཞུས་ཤིང་བཀུར་སྟི་མཛད་ཚུལ་དང་། ལྷག་ཏུ་པཎ་ཆེན་སྨྲྀ་ཏི་མདོ་ཁམས་གླིང་ཡུལ་དུ་ཕེབས་ཏེ། གླིང་རྗེ་གེ་སར་སྐྱེས་བུའི་མཆོད་གནས་སོགས་མཛད་ཅིང་ཡུལ་དེར་འབྲེལ་འདྲེས་ངེས་ཅན་གནང་ཞིང་། ཁོང་གིས་བོད་སྐད་བསླབས་པ་མ་ཟད། གླིང་ལྡན་ཡུལ་དུ་བརྡ་སྤྲོད་སྨྲ་སྒོའི་མཚོན་ཆ་བརྩམས་ཚུལ་ཉེ་རབས་བོད་ཀྱི་མཁས་པ་ཚེ་ཏན་ཞབས་དྲུང་སོགས་ཀྱིས་གསུང་དུ་གསལ་ཚུལ་སོགས་རྒྱུ་ཆ་མང་པོས་ར་འཕྲོད་པས། པཎ་ཆེན་སྨྲྀ་ཏི་དང་གླིང་རྗེ་གེ་སར་སྐྱེས་བུ་ཟུང་ལ་བླ་སློབ་ཡོན་མཆོད་ཀྱི་འབྲེལ་བ་ཡོད་པ་གསལ་ཐག་ཆོད་པ་ཐེ་ཚོམ་མེད། ཡིན་ཡང་ཉེ་དུས་ལོ་རྒྱུས་པ་རེ་འགས་དཔྱད་འབྲས་སུ་པཎ་ཆེན་སྨྲྀ་ཏི་མཆོག་སྤྱི་ལོ་ ༡༠༣༣ ལ་འདས་པར་དངོས་བཟུང་སྟེ། གླིང་གེ་སར་འཁྲུངས་ལོ་བདུད་འཇོམས་ལུགས་སུ་བྱས་ན་སྨྲྀ་ཏི་གླིང་རྗེ་དུས་མཉམ་ཚུལ་མེད་པར་བཞེད་པ་མཁན་ཡོད། དེ་ཡང་སྤྱིར་གླིང་རྗེ་དང་སྨྲི་ཏི་ཞལ་མཇལ་བའི་དུས་ཚོད་གསལ་ཐག་ཆོད་པ་མེད་པས་དཔྱད་འོས་སུ་མཆིས་པ་མད་མོད། འོན་ཀྱང་དེ་ནི་ད་དུང་དཔྱད་ཡུལ་མ་གཏོགས་ཐག་ངེས་ཅན་ཞིག་མི་ཆོད་སྙམ་ལ། ལྷག་པར་དུ་ཇོ་བོ་རྗེ་དང་སྨྲྀ་ཏི་རྣམ་པ་གཉིས་ལས་དགུང་ལོ་ཆེ་བ་སུ་ཡིན་རྩད་ཡང་དག་པ་གཅོད་དགོས་པའི་ཞར་ནས། ཇོ་བོ་རྗེ་བོད་དུ་ཕེབས་ཕྱིན་སྨྲྀ་ཏི་བཞུགས་ཡོད་མེད་དང་། བཞུགས་ན་དུས་ཡུན་ག་ཚོད་ལ་བཞུགས་ཡོད་མིན་ལ་འདང་རྒྱག་དགོས་ལ། གཞན་འབྲོམ་སྟོན་ཁམས་སུ་མི་ལོ་ཉི་ཤུ་ལ་བཞུགས་ཏེ། སེ་བཙུན་དང་སྨྲྀ་ཏི་གཉིས་རྩ་བའི་བླ་མར་ཚུལ་བཞིན་བསྟེན་ཚུལ་རྣམ་ཐར་ན་གསལ་ཡང་། སྐབས་དེ་དག་ཏུ་པཎ་ཆེན་སྨྲྀ་ཏི་འདས་ཚུལ་མི་གསལ་བ་དང་། ཡང་སེ་བཙུན་ལ་ཇོ་བོ་མཇལ་དུ་འགྲོ་བར་ཞུས་ཏེ། བྱང་ལམ་བརྒྱུད་ (སྤྱི་ལོ་༡༠༤༣ཡས་མས་སུ་) མངའ་རིས་སུ་བྱོན་ཚུལ་སོགས་ཀྱི་ལོ་ཚིགས་མང་པོ་ཞིག་ཡར་མར་གོང་ཞིབ་བསྒྲིགས་བྱས་ན། སྐབས་དེར་ད་དུང་པཎ་ཆེན་སྨྲྀ་ཏི་ཞལ་བཞུགས་པའི་དཔྱད་སྒོ་རྙེད་རྒྱུ་ཡོད་ལས་ཆེ་ཞིང་། སྐབས་དེར་སྨྲྀ་ཏི་ཞལ་བཞུགས་ན་གནས་གང་དུ་ཕྱག་ལས་གནང་བཞིན་བཞུགས་པ་སོགས་ལ་རྒྱུས་ལོན་བྱེད་ཡུལ་མེད་པ་ཞིག་གཞི་ནས་མ་རེད་སྙམ། དེས་ན་འུ་ཚོས་ད་དུང་རྒྱུ་ཆ་ཡང་འཚོལ་དང་དཔྱད་པ་ནན་ཞིབ་གཏོང་རྒྱུ་གལ་ཆེ་བ་མ་གཏོགས། ལོ་ངོ་སྟོང་ལ་ཉེ་བ་ཞིག་འདས་པའི་གནས་ཚུལ་ལ་འོལ་ཚོད་དང་ཡིད་འཇོག་གིས་ཐག་མི་ཆོད་འདུག་སྙམ་ནས། ལས་རིགས་འདི་ལ་བློ་ཁ་ཕྱོགས་མཁན་དག་ལ་གསལ་འདེབས་སུམེ་སྤྲེལ་ཟླ་༧པའི་ཚེས་༡༧ཉིན་བྱང་རྒྱུད་ཀྱི་ཤིང་གསེབ་ཅིག་ནས་པཎ་ཆེན་སྨྲྀ་ཏིའི་སྐུ་འདྲ་ཞིག་མཇལ་བས་རྐྱེན་བྱས་སྨིན་དབུས་ཨ་དཀར་པོས་བྲིས།

 

 


ཀློག་གྲངས།:[1253]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com