སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

གླིང་བྲོ་བདེ་ཆེན་རོལ་མོའི་ཕན་ཡོན།

གླིང་བྲོ་བདེ་ཆེན་རོལ་མོའི་ཕན་ཡོན།

ཨོཾ་བདེ་ལེགས་སུ་གྱུར་ཅིག།

འཛམ་གླིང་ཕན་བདེ་འཇོ་བའི་སྤྲིན་དཀར་ལས། །

དགེ་ལེགས་འདོད་དོན་སྩོལ་བའི་མ་ཎི་ཀ།

སྡེ་བཞིའི་ཁྲི་འཕང་མཐོ་ན་ངལ་གསོ་བ། །

སེང་ཆེན་མི་ཡི་ཉི་མ་རྒྱལ་གྱུར་ཅིག

འཇིགས་མེད་སྟོབས་བཅུའི་རྩུབ་སྟོང་འཁོར་ལོའི་རྣོ་དབལ་གྱིས། །

ཕུན་ཚོགས་སྡེ་བཞིའི་བསྟན་ལ་གནོད་པའི་བདུད་སྲིན་སྲོག །

ཀུན་ནས་གཅོད་མཛད་ཁྲག་འཐུང་དཔའ་བོ་གཡུ་འོད་འབུམ་མེ་ཞེས། །

གྲགས་པའི་རྒྱལ་མཚན་སྲིད་ན་མཐོ་བ་གང་དེ་རྒྱལ་གྱུར་ཅིག །

སྨད་བྱུང་ཕྲིན་ལས་བཞི་ཡི་ཡོ་ལང་གིས། །

མཛད་པའི་གྲགས་སྙན་སྲིད་ཞིའི་ཁྱོན་ན་ལྡིར། །

འཛམ་གླིང་རྒྱལ་པོའི་ལས་བཞི་སྒྲུབ་པའི་གཉེན། །

གླིང་དཀར་དཔའ་ཐུལ་དྭང་སྨན་གླུ་བྲོས་མཆོད། །

དེ་ཡང་རྗེ་བཙུན་འཇམ་པའི་དབྱངས་དངོས། ཀུན་མཁྱེན་མི་ཕམ་འཇམ་དབྱངས་རྣམ་རྒྱལ་རྒྱ་མཚོའམ། བསེ་རུ་འོད་ལྡན་དཀར་པོས། སྐྱེ་འགྲོ་སྤྱིའི་བདེ་སྐྱིད་མངོན་པར་བཞད་པའི་དགོས་དབང་ཁྱད་པར་ཅན་ལ་གཟིགས་ཏེ། སྙིང་ག་དཔལ་གྱི་བེའུའི་གསང་མཛོད་ནས། །གཟུངས་སྤོབས་བློ་གྲོས་ནོར་བུའི་གཏེར་སྒོ་ལས། །

ཡོངས་སུ་བསྩལ་བའི་གླིང་དཀར་ལྷ་ཡི་བྲོ། །བདེ་ཆེན་རྡོ་རྗེའི་རོལ་མོ་འདི་ན་བརྡུངས། ། འདི་ཉིད་གྲུབ་པའི་རིག་འཛིན་གོང་མ། དོན་གཟིགས་མངའ་བ་དུ་མས་དུས་ཀྱི་རྒུད་པ་ཐམས་ཅད་དབྱིངས་སུ་སེལ་ཞིང། ནད་མུག་འཁྲུག་རྩོད་ཐམས་ཅད་རྒྱུན་ཆད་པར་བྱེད་པ། དུས་བབ་ཀྱི་ཟབ་ཆོས་ཐུན་མིན་ཞིག་ཡིན་པར་གསུངས་ཤིང་། ཁྱད་པར་༧ཆོས་རྗེ་དམ་པ་ཡིད་བཞིན་ནོར་བུ་༧འཇིགས་མེད་ཕུན་ཚོགས་འབྱུང་གནས་དཔལ་བཟང་པོ་མཆོག་གི་ཞལ་སྔ་ནས་ཀྱང་། རྟེན་འབྲེལ་དང་དགོས་པ། ཕན་ཡོན་རྒྱ་ཆེན་པོ་ཡང་ཡང་གསུངས་པས། ཐུགས་སྐྱེད་བླ་ན་མེད་པར་མཛད་པའི་དགོང་བཞེད་བཞིན། ཕྱོགས་ཀྱི་དད་ལྡན་ཚོས། གླིང་གེ་སར་འཁོར་དང་བཅས་པ་རྗེས་སུ་དྲན་བཞིན་བྲོ་འདི་འཁྲབ་ན་ཕན་ཡོན་ཆེ་བར་གསུངས་ཡོད།

དང་པོ་སྤྱན་འདྲེན།༽

མོས་ལྡན་བུ་ལ་བྱིན་གྱིས་བརླབ་པའི་ཕྱིར། །

བརྟུལ་ཞུགས་རྡོ་རྗེའི་གར་གྱི་མཁའ་ལམ་ནས། །

བདུད་འདུལ་དགྲ་བླ་ཝེར་མའི་སྐུར་བཞེངས་ཏེ། །

བྱིན་རླབས་སྤྲིན་འཁྲིགས་དངོས་གྲུབ་ཆར་རྒྱུན་ཕོབ། །

མཁའ་སྤྱོད་མཐོང་བ་ཀུན་སྨོན་ནས་སེང་ཆེན་ནོར་བུ་དགྲ་འདུལ་འཁོར་དཔའ་ཐུལ་དྭང་སྨན་དང་བཅས་པ། རྡོ་རྗེའི་གསུམ་གྱི་དཀྱིལ་འཁོར་དུ་སྤྱན་དྲངས་ན། གང་དུ་བྲོ་འཁྲབ་པའི་གནས་དེ་རུ་འབྱོན་པར་འགྱུར་བ་རྟེན་འབྱུང་བསླུ་བ་མེད་པའི་ཐ་ཚིག་གོ། །

གཉིས་པ་གླུ་གར་ཕྱག་རྒྱའི་མཆོད་པ། ༽

དར་སྣ་བ་དན་རོལ་མོའི་མཆོད་པ་བཞེས། །

བདེ་སྟོང་ཉམས་མྱོང་གསང་བའི་མཆོད་པ་བཞེས། །

སྣང་སྲིད་གཞིར་བཞེངས་གར་གྱི་མཆོད་པ་བཞེས། །

ཐམས་ཅད་མཉམ་ཉིད་ཡེ་ཤེས་མཆོད་པ་བཞེས། །

ལྟས་ངན་ཆོ་འཕྲུལ་ཟློག་པའི་རྡོག་བྲོ་དང་།

ལྷ་རྒྱལ་ཁ་གཡང་འབོད་པ་ལག་པའི་གར་དང་བཅས་རང་བྱུང་བྲོ་ཡི་མཆོད་པ་འདི་ཕུལ་པ་ཙམ་གྱིས། དཀར་ཕྱོགས་དགྲ་བླ་དགྱེས་པའི་བཞད་པ་ས་འདིར་སྒྲོག་པའི་ཞལ་བཞེས་ཡོད་པ་ཡིན།

གསུམ་པ་སྣ་ཚོགས་ཕྲིན་ལས་ལ་བསྐུལ་པ།༽

དེ་ནས་སྣ་ཚོགས་ཕྲིན་ལས་རྡོ་རྗེའི་བྲོ། །

བརྡུང་བ་ཙམ་གྱིས་བག་དྲོ་བྱིན་ཕེབ་ཅིང་། །

རྡོ་རྗེའི་རྟ་མཆོག་བཞོན་པའི་བྲོ་གར་གྱིས། །

བར་ཆད་དམ་སྲིའི་སྲོག་སྙིང་ཚལ་བར་འགེམ། །

མཁྱེན་རབ་དགོངས་པའི་ཀློང་ནས་རྩལ་ཕྱུང་ཏེ། །

རྩ་རླུང་རིག་ཁམས་ཡེ་ཤེས་མེ་ཆེན་སྦར། །

དབང་འབྱོར་མཐུ་སྟོབས་ནུས་པའི་དངོས་གྲུབ་འཐོབ། །

བདུད་བཞིའི་འཇིགས་པ་མཐའ་དག་ཁྱེད་ཀྱིས་སེལ །

བཞི་པ་བཀྲ་ཤིས་འཇོག་པ།༽

བཀྲ་ཤིས་རྟེན་འབྱུང་དགེ་བའི་རོལ་མོ་ཡི། །

གདོད་ནས་རྣམ་གྲོལ་སྒོ་གསུམ་ལྷའི་དཀྱིལ་འཁོར། །

ཟབ་མོའི་རྡོ་རྗེའི་ཐེག་མཆོག་ལ་གནས་ནས། །

མྱུར་དུ་རྣམ་གྲོལ་རྒྱལ་བའི་དབང་པོ་འཐོབ། །

མཇུག་ཏུ་བཀྲ་ཤིས་སྨོན་པ་དཀར་པོའི་ཞབས་བྲོ། འཁྲབ་པ་ཙམ་གྱིས་ས་ཡི་བཅུད་གསོ། འབྱུང་བཞིའི་འདུ་བ་སྙོམ། ཁ་ལས་རླུང་རྟ་དར་བ་རྩ་གསུམ་སྲུང་མའི་བདེན་ཚིག་བསླུ་བ་མེད་པའོ། །

འཛམ་གླིང་ཞི་བདེ་དང་། བོད་ཡུལ་བདེ་སྐྱིད་འབྱུང་པའི་ལ་ཉེ་བཟང་པོ་ཙམ་དུ་མ་ཟད། གྲུབ་པའི་རིག་འཛིན་རྣམས་ཀྱིས་བདེན་ཚིག་བསླུ་བ་མེད་པ་ལགས། གླིང་བྲོ་འདི་ཡི་ཕན་ཡོན་༧ཀུན་མཁྱེན་མི་ཕམ་རྒྱ་མཚོའི་གསུང་རབ་རྣམས་དང་། སྔོན་བྱོན་བླ་མ་གོང་མ་རྣམས་ཀྱིས་ཡང་ཡང་གསུངས་པ་ལས་རྒྱ་ཆེར་ཤེས་པར་བྱའོ། །

ཞེས་པ་ཚེ་རིང་དཔལ་འབྱོར་གྱིས་རྩོམ་སྒྲིག་བྱས་པ་དགེ།།

ཀློག་གྲངས།:[1575]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com