སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

འུར་རྡོ་བཤད་པ། ནེའུ་ཆུང་ལུ་གུའི་ཚར་ཡག་གི་གླུ།

 

ན་མོ་གུ་རུ་དེ་ཝ་ཌཱ་ཀི་ཡེ། །

གླུ་ཨ་ལ་ལ་མོ་ཨ་ལ་ལེན། །

གླུ་ཐ་ལ་ལ་མོ་ཐ་ལ་ལེན། །

མགོན་རྗེ་བཙུན་སྒྲོལ་མ་ཐུགས་རྗེ་ཅན། །

སྐྲ་ལན་བུ་ཅན་གྱི་སྒེར་ལྷ་ཡིན། །

ལྷ་དེ་ཡི་ཡན་ལ་འདི་འབོད་མེད། །

གསོལ་བ་སྙིང་གི་དཀྱིལ་ནས་འདེབས། །

ལུས་ངག་ཡིད་གསུམ་བྱིན་གྱིས་རློངས། །

སེམས་ཉིད་རང་ངོ་ཟིན་པ་ཡི། །

ཉམས་དང་རྟོགས་པའི་ཕ་ཕོགས་སྩོལ། །

ས་འདིའི་ས་ངོ་ལོས་རེ་མཁྱེན། །

ལྕི་སོས་ཡག་གི་ཁ་མདོ་ཡི། །

ཕྱི་ལྟས་སྦྲིས་ཆུང་བསེ་རུ་ལ། །

ནང་དུ་བདེ་མཆོག་སྦས་ཡུལ་རྫོགས། །

ལྷ་སྲས་ཇོ་རུ་འཁྲུངས་པའི་ཡུལ། །

ཨ་མའི་བཞོ་གླུ་སྙན་ས་དང་། །

ལྷ་སྲས་སྐུ་རྩེད་མཛད་ས་རེད། །

ང་དང་ང་ངོ་མ་མཁྱེན་ན། །

སྔོ་ལོ་ཐར་བའི་བུ་མོ་ལ། །

ནེའུ་ཆུང་ལུ་གུའི་ཚར་ཡག་ཟེར། །

ཆུང་ཆུང་ལུ་གུ་འཚོ་རོགས་དང་། །

ཡང་ཆུང་མེ་ཏོག་འཐུ་རོགས་ཡིན། །

རྨི་ལམ་ཉམས་སྣང་གསལ་ལེ་དང་། །

ཤེས་རིག་བློ་ཁོག་ཡངས་ཙམ་ཡིན། །

དེ་ཚོ་ཡིན་ལུགས་འདྲ་མ་ཙམ། །

དེ་ནས་ལྷ་སྲས་ཇོ་རུ་ལགས། །

དཔེ་དང་འདྲ་མ་འདི་འདྲ་འདུག །

དུང་སྒོང་ནང་གི་ཁྱུང་ཕྲུག་དེ། །

གཤོག་རྩལ་རང་བཞིན་ཤུགས་ཀྱིས་རྫོགས། །

གང་བུའི་ནང་གི་མེ་ཏོག་དེ། །

མཛེས་མདངས་རང་བཞིན་ཤུགས་ཀྱིས་རྒྱས། །

སྦྲིས་ཆུང་ནང་གི་ལྷ་ཡི་སྲས། །

རྫུ་འཕྲུལ་སྟོབས་རྩལ་ལྷུན་གྱིས་གྲུབ། །

རིགས་བཞིའི་མཁའ་འགྲོའི་གཅེས་ཕྲུག་ཁྱེད། །

དགུང་ལོ་བཞི་ལ་ངོ་ལྟས་རེད། །

ལས་བཞིའི་འཕྲིན་ལས་ཐོགས་པ་མེད། །

དགྲ་བཞི་ཟིལ་གྱིས་ལོས་ཀྱང་ནོན། །

བདུད་བཞི་དམ་ལ་ལོས་ཀྱང་ཐོགས། །

སྡེ་བཞིའི་མངའ་ཐང་ལོས་ཀྱང་རྒྱས། །

མི་འཇིགས་བཞི་ཡི་ཁྲི་འཕང་ལ། །

མི་རིང་མྱུར་དུ་ལོས་ཀྱང་འགྱིང་། །

དེ་རིང་སྔོ་ལོའི་ནེའུ་ཆུང་ངས། །

སྤྲུལ་བའི་ལྷ་སྲས་ཇོ་རུ་ལ། །

བཀྲ་ཤིས་མཚན་མ་རྫས་ཀྱི་མཆོག །

དགྲ་བླའི་རྟེན་མཁར་དང་པོ་ལ། །

དགྲ་འདུལ་མཚོན་གྱི་ཐོག་མ་སྟེ། །

འུར་རྡོ་མ་མགོན་སྒྱོགས་ཐག་འབུལ། །

ནེའུ་ཆུང་ལུ་གུའི་ཚར་ཡག་ངས། །

ལྷ་དང་བླ་མར་འཕྲིན་བཅོལ་བྱས། །

ལྷ་ཀླུ་གཉན་གསུམ་གྲོགས་ལ་བཀུག །

སྣང་སྲིད་དགྲ་བླ་ཝེར་མ་དང་། །

ཡུལ་སྐྱོང་གཞི་བདག་ལས་ལ་བསྡུས། །

རྟེན་འབྲེལ་སྨོན་ལམ་དཔང་དུ་བཞག །

ལྷག་བསམ་དཀར་པོའི་སེམས་མཆོག་བསྐྱེད། །

ཏིང་ངེ་འཛིན་གྱི་རྩལ་ལ་བརྟེན། །

ཉེར་ལྔ་གསུམ་གྱིས་དུས་བཟང་ལ། །

གནས་ཡུལ་མཁའ་སྤྱོད་ས་སྤྱོད་ཉུལ། །

མཁའ་འགྲོ་སྟོང་ལ་དབུ་སྐྲ་བསླངས། །

སྔ་མོ་དཀར་ཡག་གངས་སྒོ་འགྲིམས། །

གངས་སེང་དཀར་མོའི་གཡུ་རལ་བཙལ། །

ཉི་དྲོས་ཁྲ་ཡག་རྫ་ལམ་བཟུང་། །

བྲེ་སེར་འབྲོང་གི་དཔུང་རྩིད་བླངས། །

དགོང་ཆེན་རྒྱ་རྫོང་ནགས་ལ་ཉུལ། །

དམར་ཡག་སྟག་གི་ཁ་སྤུ་དང་། །

སོག་དཀར་དྲེད་ཀྱི་སྙིང་རྩིད་བསྡུས། །

རྡོ་རྗེའི་རྫས་མཆོག་སྣ་ལྔ་ཡིས། །

དམ་ཅན་འུར་གྱི་རྒྱུ་རྩ་བྱས། །

རོག་ནག་གཡག་གི་རྩིད་རྒོད་དང་། །

གཡང་དཀར་བལ་གྱི་འཇམ་ཤ་བསྣན། །

འུར་རྡོ་ཕ་བོང་སྟོང་འཁོར་བཟོས། །

ཡར་མཆོག་ཡར་ངོ་གསུམ་ལ་བསླས། །

ཡར་ངོ་གསུམ་ལ་དཀར་སླས་བྱས། །

དཀར་སླས་ཆུ་མིག་དགུ་སྒྲིལ་བསླས། །

དཀར་ཕྱོགས་ལྷ་ཞལ་དགྱེས་ལེ་ཡོད། །

མཛུབ་ལུང་བཅོ་ལྔ་གསུམ་ལ་བསླས། །

དམ་ཅན་རྒྱ་མཚོའི་རྟེན་མཁར་བཟོས། །

རང་སྲོག་བྲག་ལས་སྲ་ལེ་ཡོང་། །

མར་མཆོག་མར་ངོ་གསུམ་ལ་བསླས། །

མར་ངོ་གསུམ་ལ་ནག་སླས་བྱས། །

ནག་སླས་ཟུར་མང་སྒང་ཁྲ་བསླས། །

ལེགས་ལྡན་དགྲ་བླའི་སྟོབས་ཤུགས་བཟོས། །

ནག་ཕྱོགས་མགོ་བོ་ནོན་ལེ་ཡོད། །

རྡོ་ལེན་གནམ་སྟོང་གསུམ་ལ་བསླས། །

རྡོ་རྗེའི་མདུད་པ་དགུ་སྒྲིལ་ལ། །

བྲེ་སེར་འབྲོང་གི་ཐོད་ཀོས་དཀྲིས། །

སྲ་བརྟན་རྡོ་ལྕགས་མཉེན་ལྕུག་ལྡན། །

ཚར་ལྕེ་ཉེར་དགུ་གསུམ་ལ་བསླས། །

དགུ་ཟུར་དཔུང་བ་རྣོ་བའི་ཕྱིར། །

གང་ལ་དམིགས་པའི་དགྲ་བགེགས་ལ། །

གནམ་ལྕགས་ཐོག་མདའ་ལྟ་བུ་ཡོད། །

འུར་མཐིལ་འབྲོང་མོའི་རྐན་སླས་ཡིན། །

ཐོ་རེངས་གསུམ་ལ་ཞིབ་མོར་བསླས། །

སྟག་གི་དུས་སུ་བཟོས་པ་ཡིས། །

གཉན་སྟག་འཁོར་བའི་ཕོ་བྲང་དང་། །

ཁྲོ་བོ་འབར་བའི་ཞལ་སྒོ་ནས། །

དགྲ་ཤ་མངོན་གསུམ་ཟ་ལེ་ཡོད། །

རྡོ་རྗེ་ཁྲོ་བོའི་དཀྱིལ་འཁོར་ནས། །

ཤེས་རབ་མཚོན་ཆའི་ཡ་གྱལ་ལ། །

བྱིན་གྱིས་རླབས་ཏེ་རབ་གནས་བྱས། །

བསྐོར་ན་ཉི་ཟླ་གཡས་སུ་འཁོར། །

འཕངས་ན་འབྲུག་སྒྲ་ལྡིར་རེ་འགྲོ། །

ཐོག་འབྲུག་གློག་གསུམ་རོལ་དུ་རྒྱུ། །

ཁོབ་སྒྲས་དགྲ་སྙིང་འགས་ལེ་ཡོད། །

འཆང་ན་དགྲ་བླའི་དཔའ་རྫོང་ཡིན། །

བཏགས་ན་བསམ་དོན་ལྷུན་གྱིས་གྲུབ། །

འུར་འདི་ཚངས་པའི་བླ་གནས་ཡིན། །

འུར་འདི་ཝེར་མའི་ལྷ་རྫོང་ཡིན། །

འུར་འདིའི་ཡོན་ཏན་བརྗོད་ལས་འདས། །

འུར་བྱུང་དང་པོ་ལྷ་ལ་བྱུང་། །

ཚངས་སྲས་ཕོ་མོ་སྟོང་གིས་བཟོས། །

ལྷ་དབང་དགྲ་བླའི་ཕྱག་ལ་བཟུང་། །

དྲག་རྩུབ་སྒྱོགས་ཀྱི་དང་པོར་གྱུར། །

ལྷ་མིན་དཔུང་བ་འུར་གྱིས་བཅོམ། །

འུར་བྱུང་གཉིས་པ་བོད་ལ་བྱུང་། །

མངའ་མཛད་ཡབ་ཀྱི་དུས་སུ་བྱུང་། །

ཀྲོག་ཀྲོག་འདྲེ་སྲིན་ཕོ་མོས་བཟོས། །

རྒྱང་ཐུབ་མཚོན་གྱི་ཐོག་མ་ཡིན། །

གཏུམ་ཆེན་སྲོག་ཆགས་སྡེ་དགུ་བཏུལ། །

འུར་བྱུང་གསུམ་པ་གླིང་ལ་བྱུང་། །

ནེའུ་ཆུང་ང་ཡིས་འཕྲུལ་གྱིས་བཟོས། །

ཤེས་རབ་མཚོན་ཆའི་བརྡ་ཐབས་དང་། །

ཇོ་རུའི་ཕྱག་མཚོན་དང་པོ་ཡིན། །

ཕྱི་ཡི་ནག་ཕྱོགས་བདུད་སྲིན་ཐུབ། །

ནང་གི་ཉོན་མོངས་དུག་ལྔ་ཐུབ། །

གསང་བ་བདག་འཛིན་རུ་ཏྲ་ཐུབ། །

མི་ཐུབ་དགྲ་ལ་གཅིག་ཀྱང་མེད། །

རྗེ་བླ་མའི་བསྣམས་ན་གཅོད་འུར་ཡིན། །

ནང་སློང་ཚད་འཁྲུལ་རྩ་དབྱིངས་སུ་གཅོད། །

སྟག་ཤ་རས་བཟུང་ན་དཔའ་ཆས་ཡིན། །

ཕྱི་དགྲ་སྡེའི་བཙན་རྫོང་ཐལ་བར་བཟོ། །

སྨན་བུ་མོས་བཏགས་ན་གཡང་རྟེན་མཆོག །

གཡང་ར་བ་སྒོ་བཞི་རང་འཁོར་ཡིན། །

མཐོ་ལ་ཁའི་ལུག་རྫི་མན་ཆོད་དང་། །

དམའ་ཞིང་མཐའི་བྱིའུ་འགོག་ཡན་ཆོད་ལ། །

འདི་འདོད་དོན་འགྲུབ་པའི་འུར་རྡོ་ཡིན། །

བོད་འཇིག་རྟེན་གངས་རིའི་གླིང་དགུ་ན། །

འུར་ཁྲ་ཐུང་མང་མོད་འདི་འདྲ་མེད། །

འདི་དམ་ཅན་མངོན་མཁོར་རྫོང་རབ་ཡིན། །

བུ་ཇོ་རུའི་སྐུ་དང་འབྲལ་མེད་མཛོད། །

གཟུགས་རགས་པའི་ཕྱོགས་བཞིའི་དགྲ་བཞི་ལ། །

འུར་ཕ་བོང་སྟོང་འཁོར་སྒྱོགས་རྡོ་རྒྱོབས། །

གཟུགས་སྣང་དང་མི་སྣང་འདྲེ་སྲིན་ལ། །

འུར་ཡེ་ཤེས་མེ་ལྕེ་རྣོན་པོ་གཡུགས། །

འུར་དམིགས་བྱ་གང་ལ་གཡུག་ཙམ་གྱིས། །

ཕྱི་རུས་པའི་བསེ་མཁར་ཞིག་ནས་འགྲོ། །

ནང་རྣམ་ཤེས་མར་མེ་འབར་ནས་འགྲོ། །

གསེང་བདེ་ཆེན་ལམ་དུ་ཁྲིད་ནས་འགྲོ། །

གཏམ་སྨྲས་པ་བཞིན་དུ་འགྲུབ་པ་ནི། །

ང་ནེའུ་ཆུང་དབྱིངས་ཕྱུག་ཚར་ཡག་མ། །

དབྱིངས་མཁའ་འགྲོའི་རིགས་སུ་གནས་པ་ཡི། །

བརྡ་རྟེན་འབྲེལ་བསླུ་བ་མེད་པས་ཡིན། །

དོན་ཨེ་གོ་ལྷ་སྲས་རིན་པོ་ཆེ། །

ཁྱེད་དུས་གསུམ་མཁྱེན་པའི་ཡེ་ཤེས་ལ། །

དོན་མང་པོ་གསལ་ཞུ་དགོས་ལེ་མིན། །

འུར་ཁྲ་ཐུང་བསྐོར་བའི་གདུགས་ཞབས་ནས། །

སྐུ་དགྲ་བླའི་དཔའ་རྫོང་བརྟན་པར་ཤོག །

སྐུས་དོན་གཉིས་ལྷུན་གྱིས་འགྲུབ་པར་ཤོག །

འུར་ཁྲ་ཐུང་འཕངས་པའི་ཁོབ་སྒྲའི་ཁྲོད། །

གསུང་འགག་མེད་འབྲུག་སྒྲ་བརྗིད་པར་ཤོག །

སྒྲ་གྲག་སྟོང་འགྲོ་སྣང་དབང་བསྡུད་ཤོག །

འུར་ཁྲ་ཐུང་འཆང་བ་སྲུང་འཁོར་འོག །

ཐུགས་བདེ་སྟོང་ཉམས་བརྒྱ་འཕེལ་བར་ཤོག །

ཉམས་བདེ་ཆེན་རྒྱུན་ཆད་མེད་པར་ཤོག །

འུར་ཕུལ་བ་ཤེས་རབ་རྫས་མཆོག་ཡིན། །

གླུ་བླངས་པ་རྟེན་འབྲེལ་མཆོད་པ་ཡིན། །

ཚོགས་རྣམ་གཉིས་ངང་གིས་རྫོགས་པར་ཤོག །

རྗེ་ཇོ་རུའི་ཐུགས་ལ་དེ་ལྟར་ཞོག །

ཅེས་བླངས་ཏེ་ཕུལ་བ་ན།

འཁྲུངས་གླིང་རྡོ་རྗེའི་རོལ་མོ་ལས་དྲངས།

 

 

 

 

ཀློག་གྲངས།:[1600]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com