སྐད་འཇོག་ས།

གླིང་གེ་སར་དྲ་བ་འདི་གཉེར་བའི་དམིགས་ཡུལ་ནི། བོད་ཀྱི་མི་སྣ་དཔའ་བོ་གླིང་རྗེ་གེ་སར་ནི་བོད་ཀྱི་ལོ་རྒྱུས་སྟེང་དངོས་སུ་བྱུང་བའི་དོན་གནས་ཀྱི་མི་སྣ་ཞིག་ཡིན་ན་ཡང་། དུས་ཀྱི་གནས་བབ་ཀྱིས་མི་སྣ་འདི་ལ་ངག་ཏུ་བརྒྱུད་པའི་དོན་དངོས་ལོ་རྒྱུས་ཐན་ཐུན་ལ་གཞི་བཅོལ་བའི་ཡིག་ཐོག་གི་ལོ་རྒྱུས་ཐད་ནས་ལྷ་སྒྲུང་ལྟ་བུར་ཆགས་ཏེ་ས་ཁྱབ་རྡོ་ཁྱབ་ཏུ་གྱུར་བ་དང་གཅིགགླིང་གེ་སར་གྱི་མི་རབས་ཕྱི་མ་དག་གིས་རང་རིགས་ཀྱི་མེས་པོའི་དོན་དངོས་ལོ་རྒྱུས་ཀྱི་དཔྱད་གཞི་ལ་ཆེར་མ་དམིགས་པར། དཔའ་བོའི་བསྟོད་སྒྲུང་གི་ཁ་སྙན་ངག་གི་འཇིག་རྟེན་ཞིག་ཏུ་ཁྲིད་དེ་རྩོམ་པ་པོ་རང་རང་གིས་རྟོག་པ་འཆར་ཡན་གྱི་ལམ་ནས་བྲིས་པ་མང་སྟབས། བོད་ཀྱི་དཔའ་བོའི་ལོ་རྒྱུས་ལ་དོན་དངོས་དང་ཉེ་བའི་ལོ་རྒྱུས་དང་། དཔའ་བོའི་བསྟོད་སྒྲུང་གི་སྙན་ངག་གཉིས་ལས་ཕྱི་མ་ཁྱབ་ཆེ་བར་སོང་སྟེ། ད་ཆ་འཛམ་གླིང་གི་རྟོགས་བརྗོད་ཆེན་མོ་འདི་ལ་སྤྱིའི་ཆ་ནས་སྙན་གྲགས་དང་མཛད་འཕྲིན་རྒྱ་ཤིན་ཏུ་ཆེ་ན་ཡང་།ཞིབ་གསལ་གྱི་ཆ་ན་སྒྲུང་མཁན་སོ་སོའི་འབྲི་སྟངས་མི་འདྲ་བ་དང་།སྔ་ཕྱི་མི་མཐུན་པ་སོགས་ལོ་རྒྱུས་པ་སོ་སོའི་འདོད་པ་མི་མཐུན་ས་མང་པོ་ཞིག་གིས་བོད་ཀྱི་གླིང་གེ་སར་རིག་གཞུང་ལོ་རྒྱུས་ལ་ཞིབ་འཇུག་པ་རྣམ་པར་དཀའ་ངལ་ཆེ་བའི་གནས་བབ་ལ་ཁ་གཏད་དེ། གླིང་གེ་སར་རིག་གནས་ཀྱི་ཕྱོགས་ཡོངས་ཀྱི་དཔྱད་གཞིའི་མ་ལགས་འཐུས་སྒོ་ཇེ་ཚང་ལ་གཏོང་ཨེ་ཐུབ་སྙམ་ནས་གཉེར་བ་ཡིན་མོད། འོན་ཀྱང་དྲ་བ་འདི་གཉེར་བ་པོར་བོད་ཁུལ་ཡོངས་ཀྱི་གླིང་གེ་སར་དོན་དངོས་ལོ་རྒྱུས་དང་ཉེ་བའི་དཔྱད་གཞི་ལ་ཐོས་མཐོང་གི་རྒྱ་ཆུང་བས། གླིང་གེ་སར་རིག་གནས་ལ་སྤྲོ་སྣང་ལྡན་པའི་རྒྱ་ཆེའི་གྲོགས་པོ་དག་གིས་དྲ་བ་འདིའི་ས་བཅད་སོ་སོའི་ཁྱབ་ཁོངས་ལ་དཔྱད་གཞི་བསྡུ་རུབ་དང་། གླིང་གེ་སར་དཔྱད་རྩོམ། གླིང་གེ་སར་སྒྱུ་རྩལ་རི་མོ། གླིང་གེ་སར་དོན་དངོས་ལོ་རྒྱུས།གླིང་གེ་སར་དང་འབྲེལ་བའི་བོད་ཡུལ་སྟོད་སྨད་བར་གསུམ་གྱི་ཡུལ་སྲོལ། གླིང་གེ་སར་འཁྲབ་གཞུང་། གླིང་གེ་སར་ལོ་རྒྱུས་སམ་བསྟོད་སྒྲུང་གསར་རྙིང་དང་རྩོམ་པ་པོ་དང་འབྲེལ་ཡོད་མི་སྣ་ངོ་སྤྲོད་སོགས་མཁོ་སྤྲོད་གནང་སྦྱིན་གྱི་བཀའ་དྲིན་སྐྱོང་རྒྱུ། མདོར་ན་བོད་རང་གི་དཔའ་བོའི་ལོ་རྒྱུས་ལ་གཅེས་སྐྱོང་གི་འདུ་ཤེས་ལྡན་པའི་སྒོ་ནས་ཕྱོགས་ཡོངས་ལ་མཛུབ་སྟོན་རྒྱབ་སྐྱོར་གནང་རྒྱུ་བཀའ་དྲིན་ཆེ་ཞུ་བ་དང་། ནོར་འཁྲུལ་དང་རིག་གནས་ཀྱིས་མ་འཇོན་ས་ཡོད་ན་རྒྱ་ཆེའི་ཀློག་པ་པོ་རྣམ་པར་གུས་བཤགས་བྱེད་ངེས་ཡིན། དེ་དང་ལྷན་བོད་ཀྱི་མེས་པོ་གླིང་རྗེ་སར་སྐྱེས་བུའི་རྣམ་ཐར་ལོ་རྒྱུས་རིང་མོའི་མཛད་འཕྲིན་འཛམ་གླིང་རིག་གནས་བང་མཛོད་ཀྱི་སྙིང་བཅུད་འདོད་འབྱུང་གི་ཡིད་བཞིན་ནོར་བུ་ལྟ་བུར་འགྱུར་ཐུབ་པའི་སྨོན་འདུན་ཡང་ཡང་ཞུ་བ་ལགས་སོ། ། ཞོར་དུ་དྲ་བ་འདིའི་གཞི་གྲངས་མཛོད་དང་ལོ་རེའི་དྲྭ་གནས་དོ་དམ་གྱི་ཁྲལ་སོགས་ཀྱི་ཐད་ནས་རོགས་སྐྱོར་གནང་མཁན་སྤྲུལ་ཀློང་ཡངས་དང་མི་ཉག་པ་འཇམ་དབྱངས་འོད་ཟེར། ཇོ་ཁྲི་འཇམ་དབྱངས་བསྟན་པའི་རྒྱལ་མཚན།དྲེལ་དཀར་སྤྲུལ་སྐུ་བསོད་བློ་སོགས་སྔ་རྗེས་སུ་ཐུགས་ཁུར་རྒྱབ་སྐྱོར་གནང་མཁན་རྣམ་པར་བཀའ་དྲིན་ཞུ་བཞིན་ཡོད།                              ཅེས་བོད་རབ་བྱུང༡༧པའི་ལྕགས་མོ་ཡོས་ལོའི་ལོ་སར་ལ་གླིང་དྲྭ་འདིའི་གཙོ་བདག་སྨིན་དབུས་པོས་ཕུལ་བཀྲ་ཤིས་པར་གྱུར་ཅི

 

 

གླིང་གི་གླུ་ངག་རབ་གསལ་ཨ་ལ་ཐ་ལ་ཞེས་བྱ་བ།


དེབ་ཆུང་འདིར་གཙོ་བོ་གླིང་གེ་སར་སྒྲུང་གླུའི་དབྱངས་རྟའི་སྐོར་གྱི་བཤད་པ་ཐན་ཐུན་དང་། གླིང་གི་མི་སྣ་ཕལ་མོ་ཆེའི་སྒྲུང་ཚིག་གནད་བསྡུས་རེ་གྱེར་བདེར་བཀོད་ཡོད་པ་སོགས། མདོར་ན་གླུ་ཨ་ལ་ཐ་ལ་ལ་ཐོག་མར་བློ་ཁ་ཕྱོགས་མཁན་རྣམ་པར་མཁོ་བའི་རྒྱུན་ཤེས་སྐོར་གསལ་བའི་ལག་དེབ་ཅིག་ཡིན་ཟེར་ཆོག་ན། དེང་གི་གར་སྟེགས་སོགས་ནས་གླིང་གེ་སར་གྱི་སྒྲུང་གླུ་སྣ་ཚོགས་གྱེར་ལེན་བྱེད་རྒྱུར་དགའ་མཁན་རྣམ་པ་དང་། གཞན་གླིང་སྒྲུང་གི་ཟློས་གར་ཚོགས་པ་སོགས་ལས་རིགས་འདི་ལ་ཆེད་དུ་འབྲེལ་བ་ཡོད་མཁན་ཚོའི་ཐུགས་ལ་ངེས་འཚལ།


ཨ་ལ་ཐ་ལའི་དབྱངས་འགྲོས་རང་བྱུང་སེམས་ཀྱི་རི་མོ།

ཨ། ཆོས་དབྱིངས་རིག་རྩལ་དོན་གྱི་ཞིང་ཁམས་ནས། ། སྐུ་གསུམ་བླ་མ་དབྱངས་ཅན་མཚོ་རྒྱལ་མས། །བདག་མགྲིན་ལོངས་སྤྱོད་འཁོར་ལོའི་དཀྱིལ་འཁོར་དུ། །འགག་མེད་རྡོ་རྗེའི་རོལ་མོའི་བྱིན་ཆེན་ཕོབ། །ཀུན་བཟང་པད་འབྱུང་གླིང་རྗེ་གེ་སར་གྱི། །གསང་གསུམ་འཕྲིན་ལས་མཛོད་ལ་དབང་འབྱོར་པའི། །དབྱིངས་ཕྱུག་ནེའུ་ཆུང་རྒྱལ་མོའི་བརྡ་མཛོད་ལས། །བདེན་གྲུབ་ཨ་ལ་ཐ་ལའི་དབྱངས་འགྲོས་བཤད། །སྤྱིར་ན་ཐབས་མཆོག་ཨ་ཡིག་སྟོང་པའི་དབྱིངས། །ཤེས་རབ་ལ་ཡིག་མཉམ་སྦྱོར་ལས་འཕྲུལ་པའི། །ཟུང་འཇུག་ཐ་ལ་ལ་མོ་རྡོ་རྗེའི་སྒྲ། །རྩོལ་མེད་རང་བྱུང་སྐྱེ་འགག་མེད་པའི་གླུ། །དེ་ཡང་སྔོན་ཚེ་གླིང་དཀར་རྒྱལ་བློན་གྱིས། །ནག་ཕྱོགས་བདུད་དཔུང་ཟིལ་གྱིས་གནོན་པའི་དུས། །ཞི་དྲག་བརྡ་ཡི་འདུ་འཕྲོ་ལས་བྱུང་བའི། །འཇིགས་མེད་དཔའ་གླུའི་དབྱངས་རྟ་སྣ་ཚོགས་སྤྲོས། །བསྐལ་མང་གོང་ནས་རང་དོན་མངོན་བྱས་ཤིང་། །གཞན་དོན་སྣ་ཚོགས་སྤྱོད་པ་སྐྱོང་བའི་དུས། །ཕྱི་རོལ་རང་བྱུང་ཁམས་ཀྱི་སྒྲ་གཟུགས་རྣམས། །སྣང་བ་དཔེ་རུ་དྲངས་ཏེ་མགུར་དབྱངས་བཞེངས། །སྣང་ཚུལ་ཙམ་ལ་དགའ་སྐྱོ་ཁྲོ་འཁྲུག་ལྟར། །གསུང་གི་གདངས་ཀྱང་ཞི་རྒྱས་དབང་དྲག་བཞི། །ཕལ་བའི་སྙན་འཇེབས་དྲག་གཏུམ་ཟོལ་བྱས་ཏེ། །མ་ངེས་སྣ་ཚོགས་དབྱངས་ཀྱི་འགྱུར་བག་ངོམ། །དཔེར་ན་རྒྱལ་པོས་ཁྲོམ་ལ་རྔམ་བརྗིད་ཅན། །ཚངས་ཆེན་དྲུག་འགྱུར་ཉམས་དང་གཡུ་འབྲུག་གདངས། །འཁོར་ལ་དར་དཀར་ཁུག་པ་བརྐྱངས་འདྲ་དང་། །ཆུ་ཆེན་འབབས་འགྲོས་ཁྱུང་ཆེན་ལྡིང་དཔེར་དྲངས། །བློན་རྣམས་དབྱངས་ནི་སྤྲིན་སྣ་བརྐྱངས་འདྲ་དང་། །རི་ལམ་ཁུག་རིས་སྟག་སེང་ངར་བའི་སྐད། །དུང་གླིང་རོལ་མོའི་སྒྲ་ཡི་ཆ་ཤས་སོགས། །རྗེ་བློན་ཀུན་ལ་མ་ངེས་མཐུན་དཔེ་མང་། །དཔའ་རྒོད་རྣམས་ལ་དྲག་མྱུར་མེ་གློག་རིས། །སྤྲིན་ནག་འཚུབ་སྟངས་དུག་སྦྲུལ་འཁྱུག་པའི་དཔེ། །ཆུ་རླུང་འཐབ་དང་རི་བྲག་ཉིལ་སྒྲ་སོགས། །སྙིང་ལ་འཇིགས་པ་སྟེར་བའི་དབྱངས་འགྲོས་མང་། །མ་སྲིང་མཁའ་འགྲོའི་དབྱངས་ནི་སྙན་ཤས་ཅན། །མཚོན་དཔེ་ཆུ་ཕྲན་ཁུག་འགྲོས་ཕུ་ཆུའི་སྒྲ། །གཡུ་སྦྲང་གཤོག་སྒྲ་ཁུ་བྱུག་འཇོལ་མོའི་སྐད། །ཅོ་གའི་དྲུག་འགྱུར་གླིང་བུའི་འགྱུར་སོགས་མང་། །ཚངས་ཆེན་དྲུག་འགྱུར་ཁྱད་ཆོས་སྟོན་པའི་བརྡ། །ཐ་ལ་དྲུག་འགྱུར་དཔེ་དང་དོན་མཚུངས་ཤིང་། །ཅོ་གའི་དྲུག་འགྱུར་དབྱངས་འགྲོས་འདྲ་མཚུངས་དང་། །དགུ་སེང་དྲུག་འགྱུར་ཆེ་བའི་རྟགས་སུ་ཆགས། །དཀར་མོ་དྲུག་འགྱུར་ཤེལ་དཀར་དྲུག་འགྱུར་སོགས། །དཔའ་བོ་དཔའ་མོ་ཕལ་གྱི་གསུང་དབྱངས་རྣམས། །སོ་སོའི་ཁྱད་ཆོས་མངོན་པར་མཚོན་བྱེད་པའི། །མཚུངས་ཟླའི་དཔེ་བཞིན་བརྡ་ཚིག་ངང་གིས་གྲུབ། །ཧཱུཾ་ཤི་ཕཊ་འགྱེལ་དྲག་སྔགས་འབར་བའི་གདངས། །ཧ་ར་ཧུར་ཐུང་རྟ་མཆོག་བཞད་པའི་དཔེ། །འབྲས་ཐུང་རི་གཟར་རྦབ་རྒོད་ལྷུང་འདྲ་དང་། །ཁྱུང་ངག་ལྡེམ་དྲུག་གཤིན་རྗེ་ཁྲོས་པའི་ཉམས། །ཕལ་ཆེར་དུག་ལྔའི་རང་འཕྲུལ་རུ་ཏྲའི་ངག །གཞོམ་བྱེད་ཡེ་ཤེས་ལྔ་ཡི་རླུང་གཡོས་པ། །གཏུམ་ཆེན་ཨ་ལ་ཐ་ལ་དྲག་པོའི་སྒྲ། །སྲེག་བྱེད་མེ་རུ་འབར་བའི་དབལ་ལྟར་རྣོ། །དེ་ཡང་གཅིག་ཏུ་མ་ངེས་སྐབས་ཐོབ་ཀྱི། །དགའ་དད་དུང་སྣང་སྐྱོ་ཤས་ངེས་འབྱུང་དང་། །སྒེག་དང་དཔའ་གཏུམ་ཉམས་རྩལ་ལས་ཐོན་པའི། །དབྱངས་ནི་ཞི་རྒྱས་དབང་དྲག་སྣ་ཚོགས་འགྱུར། །ཕྱི་རོལ་སྒྲ་གཟུགས་དྲངས་པ་དཔེ་ཙམ་ལས། །མཚོན་བྱ་ཆོས་དབྱིངས་སྐྱེ་བ་མེད་པའི་གདངས། །འགག་མེད་ལྷུན་གྲུབ་བརྟན་གཡོའི་དྭངས་བཅུད་སྒྲ། །ཡེ་ནས་གཉུག་མ་དོན་གྱི་གཤིས་སུ་འཁྱིལ། །ཡུལ་གསུམ་གྱད་གྱུར་རིག་སྔགས་གྲུབ་པའི་སྡེས། །ཨ་ལ་ཡེ་ནས་སྐྱེ་མེད་སྤྲོས་བྲལ་གདངས། །ཐ་ལ་ལར་ནས་འགག་མེད་དྲུག་ཅུའི་དབྱངས། །དུས་གསུམ་བདུད་འདུལ་ཆེ་བའི་རྟགས་སུ་སྒྲོག།རྒྱལ་ཀུན་འདུས་ཞལ་གླིང་རྗེ་སྐུ་འཁོར་གྱི། །བྱིན་རླབས་དྲོད་རྟགས་སྙིང་ལ་ཐོབ་གྱུར་ཅིང་། །ཐོས་གྲོལ་དབྱངས་རྣམས་དུས་དང་དུས་སྐབས་སུ། །བསྟན་འགྲོའི་རིམ་གྲོར་རྒྱུན་ཆད་ཡོད་མ་ཡིན། །དེ་ལྟར་ཨ་ལ་ཐ་ལ་རྡོ་རྗེའི་ཚིག། དབྱངས་སུ་གྱེར་ཚུལ་དཔེ་ཡི་རང་གཏམ་འདི། །སྣང་ཉམས་འུར་བས་ཉུང་ངུ་ཙམ་བཀོད་པ། །གཉན་སྟག་དགྲ་བླ་དམར་པོས་སྲུངས་སྤེལ་མཛོད། །ལྷོ་ཤར་ཨ་རཱ་འབྲུ་གཉིས་དབྱངས། །གློག་གི་ཕྲེང་བར་རྒྱུས་པ་ཡི། །རྒྱུ་རྐྱེན་རྟེན་འབྱུང་འདུ་བྱེད་ལས། །སྣ་ཚོགས་ཉམས་ཀྱི་སྣང་བརྙན་བཀྲ། །ཕྱི་རོལ་རྟེན་འབྱུང་རི་མོ་ཡིས། །ནང་གི་རྩ་ཐིག་རླུང་གཡོས་ཏེ། །བཅུ་དྲུག་དགའ་གླུའི་དབྱངས་འགྲོས་འདི། །འཇིགས་མེད་བརྩེ་ལྡན་རྡོ་རྗེས་བྲིས། །བཀྲ་ཤིས་རབ་ཏུ་བརྟན་པ་ཡི། ། དགེ་ལེགས་སྣང་བ་ཕུན་ཚོགས་ཀྱིས། །རབ་མཛེས་འབུམ་པ་དཔོན་གྱི་ཁྲི། །མི་གཡོ་རྡོ་རྗེའི་དཔལ་དུ་ཤོག །ཁྲོམ་ཆེན་ཟིལ་གྱིས་གནོན་པ་ལ། །དྲུག་འགྱུར་དབྱངས་ཀྱིས་རམ་འདེགས་ཚུལ། །བརྡ་ཙམ་བསྟན་པའི་ལེགས་བྱས་ཀྱིས། ། གླིང་དཀར་བསྟན་སྲིད་ཡུན་གནས་ཤོག །

ཅེས་ས་ཁྱི་ཟླ་བ་དྲུག་པའི་ཚེས་བཅུ་ལ་ཨས་སོ། །

 

 

 

 

ཀློག་གྲངས།:[145]
གླིང་གེ་སར་རིག་གནས་དྲྭ་ཚིགས།
དྲ་ཚིགས་འདིའི་པར་དབང་ཡོད་ཚད་གླིང་གེ་སར་རིག་གནས་དྲྭ་བར་དབང་བས།
འདི་ནས་རྩོམ་ཡིག་དང་བརྙན་རིས་དག་དྲྭ་བདག་ལ་འབྲེལ་གཏུགས་མ་བྱས་པར་མི་བཀོལ་བར་ཞུ།
འབྲེལ་ཡོད་རྩོམ་ཡིག་སྐུར་གནས།   382740503@qq.com